Енгил атлетика, очиқ сув ҳавзасида сузиш, бокс, таэквондо, скалолазания, байдарка ва каноэда эшкак эшиш, сувга сакраш, оғир атлетика, спорт паруси, чим устида хоккей, велотрек, юнон-рум ва аёллар кураши беллашувларида 25 та медаллар жамланмаси учун кечадиган мусобақаларда ғолиб ва совриндорлар аниқланади.
Кун давомида мамлакатимиз вакиллари 6 спорт турида Ўзбекистон шарафини ҳимоя қилади.
Терма жамоамиз аъзоларидан Тахмина Икромова бадиий гимнастиканинг яккалик мусобақалари саралашида ўз омадини синовдан ўтказса, каноэда эшкак эшувчи қизимиз Нилуфар Зокирова 200 метр масофага белгиланган саралаш баҳсларида, эркин курашчиларимиз Жавраил Шапиев ва Ғуломжон Абдуллаев кейинги босқичга чиқиш учун ҳаракат қилишади.
Шунингдек, замонавий беш курашчимиз Алисе Фахрутдинова курашларга киришса, боксчиларимиз Абдумалик Халоков ва Ҳасанбой Дўсматов финал жангларини ўтказишади.
