Ижтимоий тармоқларда “2024 йилнинг 1 октябрь санасидан бошлаб алимент тўловлари 10-15% га ошади” мазмунидаги хабарлар тарқалмоқда.
МИБ масъулларининг darakchi.uz га маълум қилишича, Ўзбекистон Республикаси Президентининг 2024 йил 18 августдаги “Иш ҳақи, пенсиялар ва нафақалар миқдорини ошириш тўғрисида”ги Фармонига кўра, 2024 йил 1 сентябрдан бошлаб пенсиялар ва нафақалар миқдори 15 фоизга, 2024 йил 1 октябрдан бошлаб педагог ходимларнинг иш ҳақи миқдори – 15, бюджет ташкилотлари ходимларининг иш ҳақи миқдори эса – 10 фоизга оширилди.
Шу билан бирга, 2024 йил 1 октябрдан бошлаб меҳнатга ҳақ тўлашнинг энг кам миқдори ҳам 10 фоизга оширилиб – 1 155 000 сўм этиб белгиланди.
Юқоридагиларга асосан, 2024 йил 1 сентябрдан бошлаб
- алимент ундируви қарздорнинг нафақасига қаратилган ижро ҳужжатлари бўйича тўланадиган алимент миқдори 15 фоизга;
- 2024 йил 1 октябрдан бошлаб алимент ундируви қарздор педагог ходимларнинг иш ҳақига қаратилган ижро ҳужжатлари бўйича тўланадиган алимент миқдори 15 фоизга;
- 2024 йил 1 октябрдан бошлаб алимент ундируви хусусий сектор ва бюджет ташкилотларида фаолият юритувчи қарздорларнинг иш ҳақига қаратилган ижро ҳужжатлари бўйича тўланадиган алимент миқдори эса 10 фоизга ошади.
Бундан ташқари, 2024 йил 1 октябрдан бошлаб юртимизда иш ҳақи миқдорининг 10 фоизга ошиши ўз навбатида Статистика агентлиги томонидан эълон қилиб бориладиган республикадаги ўртача ойлик
иш ҳақи миқдорига таъсир кўрсатиб, ишсиз алимент тўловчилар томонидан тўланадиган алимент миқдори ҳам ўртача 10 фоизга ошишини англатади.
Маълумот учун, агар алимент тўловчи шахс ишламайдиган бўлса ёки унинг иш ҳақи ва (ёки) даромадини тасдиқловчи ҳужжатлар тақдим қилинмаган бўлса, алимент қарзи ундирилаётган вақтда Ўзбекистондаги ўртача ойлик иш ҳақи миқдори бўйича ҳисоблаб чиқилади.
