Фарғона вилоятининг Бешариқ туманида яшовчи Жаҳонгирбек ва Василахонлар (исм-шарифлар ўзгартирилди)лар бир олам орзу-умидлар билан оила қурган эди. Лекин, фарзандли бўлишгач, ўзаро келишмовчиликлар сабабли оилага дарз кетди.
Орзулари саробга айланган Василахон келин бўлиб тушган уйидан вояга етмаган фарзандини ташлаб чиқиб кетишга мажбур бўлди.
Ҳали 2 ёшнинг остонасида турган норасида жигарбандини ота қўлига ташлаган онаизор унинг келажагини ўйлаб, ҳуқуқ ҳимоячиларидан ёрдам сўради. Фуқаролик ишлари бўйича Ўзбекистон туманлараро судига мурожаат этди.
Тарафлар ва холислар иштирокида бўлиб ўтган суд мажлисида бу масала атрофлича ўрганилиб, одил қарор қабул қилинди. 2023 йилда туғилган болани она парваришига муҳтожлигини инобатга олиб, уни она тарбиясига қайтариш зарурлиги белгиланди.
Суднинг ижро ҳужжати МИБ Бешариқ тумани бўлими иш юритувига қабул қилиниб, ижро ҳаракатларига киришилгач, Жаҳонгирбек яна бир “ҳунар” кўрсатишга уринди.
–Жамиятимизда оилавий ажримларнинг ортаётгани, фарзандлар тарбияси ҳамда уларнинг моддий таъминоти оғриқли масалалардан бирига айланди, миллий ўзлигимизга хос бўлмаган оилавий ажримлардан бегуноҳ фарзандлар кўпроқ азият чекиши ташвишлидир – дейди МИБ Бешариқ туман бўлими давлат ижрочиси Йўлдашали Абдуназаров.
Мазкур ҳолатда давлат ижрочилари жавобгарни бир неча марта огоҳлантиришига қарамай, Жаҳонгирбек ўғлини она тарбиясига беришга жиддий қаршилик қилди. Маъмурий жавобгарликка тортилиб, қонунда кўрсатилган ҳуқуқ ва мажбуриятлари тушунтирилди.
Айни пайтда бола она тарбиясига соғ-саломат олиб берилиб, ижро ҳужжати ижроси тугатилди.
