Ижтимоий тармоқда ўзига нисбатан уятсиз бузуқ ҳаракатлар қилинганини айтаётган вояга етмаган қиз билан боғлиқ видео тарқалди.
Болалар омбудсманининг аниқлашича, 2024 йил 12 октябр куни Қарши шаҳрида яшовчи Ж.Д. (аёл) Қашқадарё вилояти ИИБнинг 102-рақамли телефонига мурожаат қилиб, турмуш ўртоғи (2021 йилдан у билан бирга яшаб келаётган) Б.Қ. аёлнинг 2017 йилда туғилган қизига нисбатан жинсий зўравонлик ҳаракатларини қилгани тўғрисида хабар берган.
Ҳолат юзасидан Қарши шаҳар ИИБ ФМБ ҳузуридаги Тергов бўлими дарҳол терговга қадар текширув бошлаб, кечиктириб бўлмайдиган тергов ҳаракатларини олиб борган. Болага нисбатан тегишли суд-тиббиёт экспертизаси тайинланган.
- Мазкур ҳолат бўйича Болалар омбудсмани бола манфаатлари нуқтаи назаридан ўз кузатувини давом эттирмоқда. Иш бориши юзасидан қўшимча тарзда маълумот берилади, - дейилади хабарда.
