25 октябрь куни “Дебат холл”даги сўнгги теледебат ҳам халқаро тажрибаларга мос тарзда ўтказилди ва унда болаларни ҳимоя қилиш мавзусиалоҳида тилга олинди.
Хусусан, “Адолат” партияси спикери Г.Агзамова, мактабларда болаларга стоматология хизмати кўрсатилишини таъминлаш таклифини билдириб ўтди. Экопартия вакили Н.Иноятоваэса болалар соғлиғига салбий таъсирини инобатга олган ҳолда, 21 ёшдан кичик шахсларга энергетик ичимликларни сотишни тақиқлаш таклифини илгари сурди.
ЎзЛиДеП спикери Ш. Холмахматова болалар марказларини яратиш ташаббусини қўллаб-қувватлаган ҳолда мактаблардаги психологлар сонини ошириш, бу орқали болалардаги психологик муаммоларни эрта аниқлаш ва олдини олиш мумкинлиги ҳақида гапириб ўтилди.
Шуни ҳам таъкидлаш лозимки, ХДП Спикери С. Имомова томонидан мазкур таклиф танқид қилинди ва давлат дастурларини қайта кўриб чиқиш ва оилаларнинг ижтимоий муаммоларига кўпроқ эътибор қаратиш лозимлиги таъкидланди.
МТДП вакили талаба оналарнинг фарзандлари учун олий таълим муассасалари ҳузурида махсус болалар хоналари ёки боғчалар ташкил этиш ташаббусини билдирди.
Алоҳида таъкидлаш керак, сўнгги дебат ҳам ўта қизиқарли бўлиб, қизғин баҳс-мунозаралари билан ёдда қолди, унда ҳар бир партия спикери кўтарилган масалалар юзасидан ўз ёндашувини таклиф қилди. Аёл спикерларнинг ишончли чиқишлари болаларнинг ҳолатини, ижтимоий ҳимоясини яхшилаш учун курашга тайёрлигини кўрсатди.
Эътироф этиш жоиз, дебатда аёл номзодлар ўзининг ўта фаоллиги, вазминлиги, кенг дунёқараши, шижоаткорлиги, ҳозиржавобгарлиги билан алоҳида ажралиб туришди. Қолаверса, бошқа партия спикерларига ўзлари томонидан берилган баъзи саволларга жавоблардан қониқиш ҳосил қилмасдан, ўз позицияларини ҳам аниқ билдириб ўтишди.
Юқори даражада ўтказилган дебатлар формати турли ёндашувларни муҳокама қилиш имконини берди ва бу муҳокама томошабинлар учун ҳақиқий маънода қизиқарли бўлди.
