Ижтимоий тармоқларда Тошкентда йўловчи автобуси иштирокида содир бўлган ЙТҲ акс этган видео тарқалди.
"Тошшаҳартрансхизмат" АЖ Матбуот хизмати хабарига кўра, ҳолат 11 ноябр куни соат 06:00 ларда, "18-Автобус саройи" филиали тасарруфидаги "King Long" русумли, давлат рақами 01| 392 МКА бўлган, 121-сонли йўналишда ҳаракатланаётган ҳайдовчи Ғ.М томонидан содир этилган.
Автобус, Учтепа тумани, ТҲАЙ кўчаси, Белтепа мазвеси бўйлаб ҳаракатланиб бораётган вақтда ҳайдовчининг бошқарувни йўқотиши оқибатида, йўл четидаги кўчатлар сотиладиган жойга кириб кетиши натижасида йўл-транспорт ҳодисаси юз берган.
Мазкур йўл-транспорт ҳодисаси натижасида 1 нафар йўловчи енгил тан жароҳати олган ва тез тиббий ёрдам кўрсатилган. "King Long" русумли автобус техник шикастланган.
Йўл-транспорт ҳодисаси автобус ҳайдовчиси Ғ.М айби билан содир этилгани сабабли, ҳодиса натижасида давлат рақами 01 | 392 МКА бўлган “King Long” русумли автобусга етказилган моддий зарар ҳайдовчи томонидан қопланади.
Ҳозирда ушбу йўл-транспорт ҳодисаси Тошкент шаҳар ИИББ ЙҲХБ ходимлари томонидан расмийлаштирилиб, суриштирув ишлари олиб борилмоқда.
