Сирдарё вилоятида ҳайдовчидан пора талаб қилган ЙПХ инспектори қамалди. Наманганда ЙПХ ходимига пора таклиф қилган ҳайдовчига жиноят иши қўзғатилди.
Сирдарё вилоятидаги ҳолатда ЙҲХХ катта инспектори йўл-транспорт ҳодисаси содир этган ҳайдовчининг ишини унинг фойдасига ҳал қилишни ва ҳодисада жабрланган йўловчилардан бирининг тан жароҳати бўйича суд тиббий экспертизасини енгиллаштиришни ваъда қилиб, 400 доллар талаб қилган.
Ҳайдовчининг бунча пули бўлмаган ва у ҳуқуқни муҳофаза қилувчи органларга мурожаат қилган. Унинг аризасига асосан ўтказилган тезкор тадбир ўтказилиб, инспектор ўз хизмат хонасида 200 долларни олаётганида ушланган.
Инспекторнинг иши судда кўриб чиқилган. У Жиноят кодексининг 210-моддаси (пора олиш) 1-қисмида назарда тутилган жиноятни содир этганликда айбли деб топилиб, 3 йил муддатга ИИОда ҳар қандай лавозимда ишлаш ҳуқуқидан маҳрум қилган ҳолда, 4 йил муддатга озодликдан маҳрум қилинди.
Наманган вилоятининг Косонсой туманида содир бўлган ҳолатда ЙПХ инспектори “Жигули” автомобилини тўхтатиб, ҳайдовчидан ҳужжатларини сўраганда у қалбаки ҳайдовчилик гувоҳномасини тақдим этгани учун маъмурий баённома расмийлаштириб, транспорт воситасини жарима майдонига жойлаштирган.
Фуқаро қалбаки ҳайдовчилик гувоҳномаси бўйича тўпланган ҳужжатларни тергов органларига юбормаслик ҳамда автомашинасини жарима майдонидан чиқариб бериш эвазига 150 долларни пора сифатида таклиф қилган.
Инспектор фуқаронинг бу ҳаракатлари ноқонунийлиги ва жиноий жавобгарликни келтириб чиқариши тўғрисида уни бир неча бора огоҳлантирганига қарамай, фуқаро такроран пора таклиф қилиб келган.
ЙПХ ходими ИИВ Шахсий хавфсизлик бош бошқармаси Наманган вилояти бўйича бошқармаси бошлиғи номига билдирги билан мурожаат қилган ва тезкор тадбир ўтказилиб, фуқаро инспекторга 100 доллар ва 600 минг сўм пулни пора тариқасида берган вақтида ашёвий далиллар билан ушланган.
Ҳолат юзасидан фуқарога нисбатан Жиноят кодексининг 211-моддаси (пора бериш) билан жиноят иши қўзғатилган бўлиб, тергов ҳаракатлари олиб борилмоқда.
