Жорий йилнинг июль ойида Янгийўл туманида бир оиланинг барча аъзолари ўлдирилиб, уйига ўт қўйилгани ҳақида хабар берилган эди.
Ўшанда ёнғин бартараф этилгач, хонадонни кўздан кечириш давомида 1991 йилда туғилган эркак, 1999 йилда туғилган аёл, 2021 ва 2022 йилда туғилган болалар, 2018 йилда туғилган қизнинг мурдалари турли тан жароҳатлари билан топилган. Бош прокуратура маълум қилишича, вафот этганлар эр-хотин ва уларнинг 2 нафар фарзанди, 1 нафар қиз жияни бўлган.
Гумонланувчи шахс (1995 й.т.) жабрланувчи эркак (марҳум) нинг қариндоши ҳисобланиб, у ушбу жиноятни ўрталарида мавжуд бўлган қарз муносабати сабабли содир этганлиги маълум қилинган эди.
Олий суд Матбуот хизматининг хабар беришича, бугун Тошкент вилоят судида Жиноят кодексининг 97 (қасддан одам ўлдириш), 118 (номусга тегиш), 134 (қабрни таҳқирлаш), 164 (босқинчилик) ва 173 (мулкни қасддан нобуд қилиш ёки унга зарар етказиш) моддаларида назарда тутилган жиноятларни содир этганликда айбланаётган З. С. га (эркак, 1995 йилда Наманган вилоятида туғилган) оид жиноят ишини биринчи инстанциясида кўриб чиқиш бўйича суд жараёни бошланди.
Ушбу жиноят иши Жиноят-процессуал кодексининг 19-моддаси талабларига мувофиқ ёпиқ суд мажлисида кўриб чиқилади.
Қўшимча маълумот суд жараёни якуни бўйича берилади.
