Қарши шаҳрида эркак ва унинг 3 нафар фарзанди ўз уйида иситиш тизимидан чиққан ис газидан заҳарланиш оқибатида вафот этди. Бу ҳақда Бош прокуратура матбуот хизмати раҳбари Ҳаёт Шамсутдиновнинг darakchi.uz'га маълум қилди.
Қайд этилишича, воқеа 17 декабрь куни содир бўлган. Ота 46 ёшда, ўғли 18, икки қизи 16 ва 10 ёшда бўлган.
Кўздан кечириш давомида аниқланган дастлабки ҳолатга кўра, уйнинг ертўласида ўрнатилган замонавий иситиш қозонининг (“двух контурний котёл”) ёнган ис гази чиқиши учун ўрнатилган мўрининг умумий ҳаво тортиш мўрисига (“витяжная вентиляция”) уланган қисмидан ис газининг сизиб чиқаётгани аниқланган.
Ҳодиса юзасидан Қарши шаҳар прокуратураси томонидан терговга қадар текширув ҳаракатлари олиб борилмоқда.
Эслатиб ўтамиз, 7 декабрь соат 9:20 лар атрофида Асака тумани, Учтош кўчасида яшовчи 1985 йилда туғилган фуқаро М.А. ва унинг 1986 йилда туғилган турмуш ўртоғи М.А.нинг жасади яшаш хонадонида қўлбола усулда ясалган иситиш печига солинган кўмир ёқилғисидан сизиб чиққан ис газидан заҳарланиш аъломатлари билан топилгани ҳақида хабар берилганди.
