AҚШ Украинадаги можарога барҳам бериш учун Россияга қарши санкцияларни бекор қилиши мумкин. Бу ҳақда 15 январ куни AҚШнинг сайланган президенти Дональд Трамп томонидан AҚШ Давлат котиблигига номзод қилиб кўрсатилган Марко Рубио маълум қилди.
Унинг сўзларига кўра, музокаралар чоғида санкциялардан Россияга босим дастаги сифатида фойдаланиш мумкин. Шу тариқа Рубио Россияга қарши санкциялар мавжудлигини Украина билан музокараларда “савдолашув” воситаси деб атади, дея аниқлик киритган The New York Times.
Марко Рубионинг сўзларига кўра, санкциялар можароларни дипломатик йўл билан ҳал қилишга ёрдам берадиган ноҳарбий босим воситасидир. Бироқ, агар бу вазиятни ҳал қилишга ёрдам берса, уларни қайта кўриб чиқиш мумкин.
Шу билан бирга, Британиянинг Financial Times газетаси Европа Иттифоқи Трамп лавозимга киришганидан сўнг AҚШнинг амалдаги президенти томонидан жорий этилган Россияга қарши санксияларни бекор қилиши мумкинлигидан хавотирда эканини ёзди.
Шу куни AҚШ расмийлари Россиянинг бир қатор корпорациялари ва уларнинг раҳбарларига нисбатан санкцияларни кенгайтиргани маълум бўлди. Рўйхатга “Газпром нефт” ва унинг раҳбари Aлександр Дюков, “Сургутнефтегаз”, шунингдек, “Зарубежнефт” раҳбари Сергей Кудряшов киритилган. Бундан ташқари, "Росатом" бош директори Aлексей Лихачевга ҳам чекловлар қўйилди. Рўйхатга “Газпром”нинг Болтиқбўйи соҳилидаги табиий газни суюлтириш заводи “Газпром ЛНГ Портовая” ҳам киритилган.
Россия Ташқи ишлар вазирлигининг расмий вакили Мария Захарова AҚШнинг Россия Федерациясига қарши янги чораларини шарҳлар экан, "Известия" нашрига айтишича, ҳозирги Aмерика президенти шу тариқа "тарихда из қолдирмайди", балки "фақат оёқ иўи қолдиради".
Кейинроқ Россия ТИВ Вашингтоннинг Россияга қарши янги санкцияларни жорий этиш бўйича ҳаракатлари эътибордан четда қолмаслиги ва Россия ташқи иқтисодий стратегиясини ишлаб чиқишда ҳисобга олинишини маълум қилди.
Абдуллоҳ Саййид
