ҲАМАС ҳаракати 31 январга қадар учта исроиллик гаровга олинган шахсни, шу жумладан аскар Арбель Йехудни озод қилади. Бу ҳақда Қатар Ташқи ишлар вазирлигининг расмий вакили Мажид ал-Ансари хабар берди. Унинг сўзларига кўра, яна бир нечта асир 1 феврал куни озод қилинади.
"ҲАМАС ҳаракати ва воситачилар ўртасида олиб борилаётган давомли саъй-ҳаракатлар натижасида Арбель Йехуд ва яна икки асирни 31 январга қадар озод қилиш бўйича келишувга эришилди», — деб ёзди Қатарнинг ташқи ишлар вазирлиги вакили ижтимоий тармоқда. Шунингдек, ҲАМАС билан олиб борилган келишувлар доирасида Исроил сектор Ғазо аҳолисига “Нетразим йўлаги” орқали секторнинг шимолий қисмига қайтишига рухсат беради, деб қўшимча қилди у.
Арбель Йехуднинг 25 январь куни озод қилиниши кутилган эди, аммо унинг ўрнига ҲАМАС тўрт аскар қизни озод қилди. Исроил бош вазири Бинямин Нетаньяҳунинг девонхонаси билдиришича, Исроил Арбель Йехуд хоним озод қилинмасдан туриб, тинч аҳолининг шимолий секторга қайтишига рухсат бермайди.
Исроил ва ҲАМАС орасидаги ўт очишни тўхтатиш тўғрисидаги келишув 19 январдан кучга кирган. Шу куни ҲАМАС уч асирни озод қилди ва Исроил армияси Ғазо ҳудудидан қўшинларини олиб чиқаришни бошлади. Исроил ва ҲАМАС орасидаги гаровдаги шахсларни ва қамоқдаги маҳбусларни алмашиш бўйича амалиётнинг иккинчи раунди 26 январда амалга оширилди. Шу куни ҲАМАС тўрт аскарни озод қилди ва Исроил қамоқхоналаридан 200 фаластинлик озодликка чиқарилди.
Абдуллоҳ Саййид
