Сиднейлик эркак уйининг орқа ҳовлисида 102 та заҳарли илон яширинган ин топиб олди. Эркак судралиб юрувчиларни тутиш билан шуғулланадиган Reptile Relocation ташкилотини чақирди.
Илонлар тўкилган барглар уюмига ин қурган, улардан бири уй эгасининг итини чақиб олмагунча ҳеч ким уларни сезмаган. Reptile Relocation раҳбари Кори Кереваронинг айтишича, судралиб юрувчилар шунчалик кўплигидан, уларни тутиш учун овчиларга қўшимча ёрдам керак бўлган.
Компания мутахассислари уч соат ичида 102 та қизил қоринли қора аспидни қўлга олди. Бу заҳарли илонлар фақат Австралияда яшайди. Вояга етган судралиб юрувчиларнинг узунлиги икки метрга етади. Одатда, бу тур вакиллари тажовузкор бўлмайди ва одамлардан ўзини олиб қочади.
Аспидлар заҳари таркибида нейротоксинлар, миотоксинлар ва коагулянтлар мавжуд. У инсон учун жиддий оқибатларга олиб келиши мумкин, аммо ўлим ҳолатлари қайд этилмаган.
Ҳудудда тутиб олинган барча илонлар Қироллик миллий боғи яқинидаги ёввойи табиатга қўйиб юборилади. Австралия музейининг илмий бўлими маълум қилишича, бу турдаги илонлар насл қолдириш даврида кичик гуруҳларга тўпланиши мумкин — одатда олти нафаргача.
“Овчилар ҳали бирор марта битта жойдан шунча кўп қизил қоринли қора аспидларни топмаган эди”, — дея таъкидлади Кори Кереваро.
