Украина президенти Владимир Зеленский урушни тугатиш бўйича шошилинч ва ўйланмаган қарорлар қабул қилиниши мамлакатни Афғонистондагига ўхшаш вазиятга олиб келиши мумкинлигидан огоҳлантирди.
Унинг таъкидлашича, ўт очишни тўхтатишнинг ўзи етарли эмас ва Украина ҳеч қачон ўз ҳудудининг бир қисмидан воз кечмайди.
Зеленскийнинг бу баёноти АҚШ ва Россия ўртасида Саудия Арабистонида ўтказилган музокаралар фонида янгради. Ушбу музокараларда Украина ва Европа давлатлари иштирок этмаяпти, бу эса Киев ва Европа пойтахтларида норозиликка сабаб бўлди. Зеленский Украина иштирокисиз ўтказилган ҳар қандай келишувни қабул қилмаслигини маълум қилди.
Шунингдек, Украина президенти АҚШнинг Россия билан музокаралардаги позициясини танқид қилиб, уларнинг Путинга нисбатан "жуда ёқимли" сўзлар ишлатишаётганини таъкидлади. Унинг фикрича, бу ҳаракатлар тезкор муваффақиятга эришиш мақсадида амалга оширилмоқда.
Зеленскийнинг таъкидлашича, агар Украина Европа Иттифоқи ва НАТОга қабул қилинса, Россия қўшинлари мамлакатдан олиб чиқиб кетилса ва Киевга хавфсизлик кафолатлари берилса, музокараларга эҳтиёж қолмайди. У бу шартлар бажарилмагунча, ўз ватани ҳимоясини давом эттиришини билдирди.
Айни пайтда, Зеленский АҚШнинг Россия ва Украина бўйича махсус вакили Кит Келлогни Донецкдаги фронт чизиғига таклиф қилди. Бу ташриф орқали у Вашингтонга Украинадаги урушнинг ҳақиқий ҳолатини кўрсатишни мақсад қилган.
Европа давлатлари ҳам музокараларда иштирок этмасликларидан норозилик билдиришмоқда. Франция президенти Эммануэль Макрон Европа етакчиларининг Парижда фавқулодда учрашувини чақириб, музокараларда Европа манфаатларини ҳимоя қилиш зарурлигини таъкидлади.
Шу тариқа Украина ва Европа давлатлари урушни тугатиш бўйича ҳар қандай келишувда ўз иштирокларини таъминлашга интилишмоқда, акс ҳолда улар бундай келишувларни тан олмасликларини билдиришмоқда.
Абдуллоҳ Саййид
