Ўзбекистондаги Ислом цивилизацияси марказида Кенгайтирилган илмий кенгашнинг навбатдаги учрашуви бўлиб ўтди. Унда Ўзбекистон тарихи давлат музейи, Дин ишлари бўйича қўмита, Имом Бухорий, Имом Термизий ва Имом Мотуридий халқаро илмий тадқиқот марказлари раҳбарлари ҳамда Ўзбекистон мусулмонлари идораси вакиллари иштирок этди.
Учрашувда асосий эътибор Марказнинг кириш фойесида жойлаштириладиган маҳобатли ранг-тасвир асарларига қаратилди. Давлатимиз раҳбари жорий йил 29 январь куни ушбу марказга ташриф буюриб, мазкур асарлар юзасидан тегишли тавсиялар берган эди.
Муҳокамалар давомида равоқларда Ислом оламининг буюк вакиллари – Абу Мансур Мотуридий, Абу Муин Насафий, Қаффол Шоший, Абуллайс Самарқандий сиймосини акс эттириш масаласи кўриб чиқилди. Ҳозирда Ўзбекистон Бадиий академияси вакиллари ҳамда таниқли рассомлар томонидан бу борада илмий ва бадиий тадқиқотлар олиб борилмоқда.
Учрашувда, шунингдек, тарихий шахсларнинг нафақат мамлакатимиз, балки жаҳон илмий ва маданий тараққиётига қўшган ҳиссасига ҳам алоҳида урғу бериш зарурлиги таъкидланди. Шу боис, Биринчи Ренессанс давридан ХХ асргача бўлган йирик алломаларнинг сиймосини акс эттириш режалаштирилган.
Айни пайтда равоқларда Имом Бухорий, Имом Термизий, Абу Али ибн Сино, Абу Райҳон Беруний, Баҳовуддин Нақшбанд, Жалолиддин Мангуберди, Амир Темур, Мирзо Улуғбек, Алишер Навоий ва Заҳириддин Муҳаммад Бобур каби буюк шахсларнинг портретлари тайёрланмоқда.
