Экология, атроф-муҳитни муҳофаза қилиш ва иқлим ўзгариши вазирлиги Ситуацион маркази томонидан республикамизнинг кўплаб ҳудудларида онлайн камералар ўрнатилган. Бу камералар орқали белгиланмаган жойларга чиқинди ташлаш билан боғлиқ ҳуқуқбузарликлар аниқланмоқда.
Хусусан, 2024 йилда Сирдарё, Самарқанд ва Хоразм вилоятларидаги салбий ҳолатлар онлайн камераларга муҳрланди.
Унга кўра, Сирдарё вилоятида 21 та кузатув камераси ўрнатилган бўлиб, ўтган йилда жами 81 та қоидабузарлик ҳолати қайд этилган ва барчасига чора кўрилган.
Шунингдек, Самарқанд вилоятида ўрнатилган 25 та кузатув камераси орқали ўтган йили жами 2948 та қоидабузарлик аниқланган. Шундан 219 та ҳуқуқбузарлик бўйича маъмурий жавобгарлик қўлланилиб, жарима ундирилган. Қолган 2729 та қоидабузарлик ижро жараёнида.
Бундан ташқари, Хоразм вилоятида ўрнатилган 17 та кузатув камераси орқали 2024-йилда жами 108 та қоидабузарлик аниқланган. Шундан 61 та ҳуқуқбузарлик бўйича маъмурий жавобгарлик қўлланилиб, жарима ундирилган. Қолган 47 та қоидабузарликка чора белгиланмоқда.
Маълумот учун, республикамизнинг деярли барча ҳудудларида жами 250 та онлайн камера ўрнатилган бўлиб, бу камералар нафақат чиқинди ташлаш, балки бошқа турдаги экологик ҳуқуқбузарликларни ҳам аниқлаш ва чора кўриш имконини беради.
