Жиззах вилоятидаги мактабда 1,1 млрд сўмга қурилган сунъий қопламали стадион том қисми қулаб тушди. Ҳолат юзасидан вилоят ҳокимлиги “Ягона буюртмачи хизмати” маълумот берди.
Унда келтирилишича, мазкур объект Жиззах вилояти ҳокимлиги “Ягона буюртмачи хизмати” ДУК буюртмачилигида ҳамда “Сувиншоот қурилиш лойиҳа” МЧЖ пудратчилигида қурилган бўлиб, лойиҳа шартнома қиймати 1 миллиард 190 миллион сўмни ташкил этади.
Дастлабки ўрганиш натижаларига кўра, стадион том қисмининг қулаб тушишига кучли табиий офат — шамол ва қалин қор ёғиши сабаб бўлгани аниқланган. Бунинг натижасида спорт майдончасининг том қисми зарар кўрган. Ҳодиса оқибатида тан жароҳати олган шахслар аниқланмаган.
Ҳолат юзасидан буюртмачи ва пудратчи ташкилотлар томонидан ўрганиш ишлари олиб борилмоқда. Пудрат ташкилоти томонидан лойиҳага мувофиқ тиклаш ишлари амалга оширилади ва стадион тез кунларда қайта тикланиб, фойдаланишга топширилади.
Бундан аввал Тошкентда 26 февралга ўтар кечаси қор ёғганидан сўнг пойтахтнинг қатор ҳудудларида дарахтлар қулагани ҳақида хабар берилганди. Оқибатда автомобиль ва симёғочларга зарар етган. Ижтимоий тармоқларда қор оғирлигидан дарахтлар қулашига уларнинг нотўғри, “палма” қилиб кесилгани сабаб қилиб кўрсатилди. Шаҳардаги барча дарахтлар Экология вазирлиги реестрида ҳисобга олинган ва шаҳар экология бошқармаси назорати остида.
Дарахтларга нисбатан “палма” атамаси қўлланиши нотўғри, чунки шаҳардаги қулаб тушган дарахтларнинг бирортаси ҳам бу тушунчага мос келмайди. Шох-шаббаларни кесиш қатъий тасдиқланган қоидаларга мувофиқ амалга оширилади ва дарахтларнинг умрини узайтиради, дейилади муносабатда.
Пойтахт ҳокимлиги коммунал хизматлар оқибатларини тезкор бартараф этаётганини билдириб, пиёдалар ва ҳайдовчиларни эҳтиёткор бўлишга чақирди.
