Сал аввал Бандлик вазирлиги Янги Тошкентни қуриш учун 8-15 млн сўм иш ҳақи билан 10 мингга яқин бўш иш ўринлари эълон қилганди. Шундан сўнг фуқаролар бу бўйича кимга мурожаат қилишни билмаётгани, кўрсатилган қисқа рақамлар эса ишламаётгани ҳақида хабарлар тарқалди.
Айни пайтда вазирлик фуқароларнинг Янги Тошкент шаҳри лойиҳаси учун бўш иш ўринлари ҳақида маълумот олиш мақсадида call-марказга қўнғироқ қилиб боғлана олмаётгани хусусида ҳолат юзасидан қуйидагиларни маълум қилди:
"Ҳақиқатдан ҳам таклиф қурилишда ишлаш истаги бўлган кўплаб юртдошларимизнинг қизиқишига сабаб бўлган. Кун давомида 1000 га яқин қўнғироқ бўлмоқда. Қўнғироқлар сони кўпайганлиги туфайли, лимит (бир пайтнинг ўзида 50 тагача қўнғироқ)дан ошганда узилиш рўй берган.
Ушбу ҳолат 4 март соат 12:00 га қадар бартараф этилади. Қолаверса, қўнғироқ қилиб, навбат кутишни истамаган (боғлана олмаган) ҳамюртларимиз учун алтернатив таклиф сифатида телеграм бот ишга туширилмоқда. Эндиликда Янги Тошкент шаҳри лойиҳаси қурилишида ишлашни истаган ҳамюртларимиз @yangi_toshkent_qurilishi_bot орқали ўзлари ҳақида маълумотларни ёзиб қолдиришса, call-марказ операторлари маълумотда кўрсатилган рақамга кун давомида қайта алоқага чиқади", - дейилади расмий муносабатда.
