Маълумки, паспортларнинг қудратини баҳоловчи турли индекслар мавжуд бўлиб, улар орасида Henley & Partners компаниясининг Henley Passport Index рейтинги алоҳида аҳамиятга эга. Бу рейтинг паспортларнинг қанча мамлакатга визасиз ёки виза олишда енгилликлар билан кириш имкониятини баҳолайди.
2025 йилдаги рейтингга кўра, Сингапур паспорти дунёдаги энг кучли паспорт сифатида тан олинди. Сингапур фуқаролари 195 та йўналишга визасиз саёҳат қилиш имкониятига эга. Иккинчи ўринда Япония паспорти бўлиб, у ўз соҳибига 193 та мамлакатга визасиз кириш имконини беради.
Рейтингнинг пастки қисмидан эса фуқароларининг визасиз саёҳат имкониятлари чекланган давлатларнинг паспортлари ўрин олган.
Энг кучсиз 10 паспорт рейтингига 27 та мамлакатга визасиз кириш имконияти мавжуд Афғонистон паспорти етакчилик қилмоқда. Иккинчи ва учинчи қаторларни эса мос равишда Ироқ (29 та мамлакат) ва Сурия (33 та мамлакат) банд қилган.
Кейинги ўринлардан эса, тартибига кўра, Яман (35), Сомали (36), Непал (38), Фаластин мухторияти (38), Судан (39) ва Шри-Ланка (41) давлатларининг паспортлари жой олган.
Таъкидлаш керак, паспортнинг қудратига кўплаб омиллар таъсир қилади. Иқтисодий ривожланиш, сиёсий барқарорлик, хавфсизлик ва бошқа давлатлар билан ўрнатилган дипломатик муносабатларнинг кўлами шулар жумласидандир.
Абдуллоҳ Саййид
