Россиянинг "АльфаСтрахование" компанияси авиакаскога кўра Embraer 190 самолёти ҳалокати учун тўлиқ суғурта тўловини амалга оширди.
"Report" нашрининг хабар беришича, бу ҳақда "Интерфакс" агентлигига "АльфаСтрахование" компаниясининг авиация ва космик суғурта бўйича бош директор ўринбосари Илья Кабачник маълум қилган.
"Қозоғистоннинг Оқтов шаҳри яқинида ҳалокатга учраган Azerbaijan Airlines (AZAL) авиакомпаниясига тегишли Embraer 190 самолёти ҳамда йўловчилар олдидаги ташувчининг жавобгарлиги "АльфаСтрахование" компанияси томонидан суғурталанган эди. Асосий риск "Россия Миллий қайта суғурта компанияси" (РНПК) томонидан қайта суғурталанган. Самолёт учун тўлов тўлиқ суғурта суммаси миқдорида 2025 йил февралда амалга оширилди", – деди у.
Шу билан бирга, у авиакаско бўйича компенсация миқдорини ошкор этмади, бироқ экспертлар уни тахминан 25–30 миллион доллар деб баҳолашмоқда.
Кабачник нима учун суғуртачи авиаҳодиса бўйича расмий тергов якунини кутишга ҳожат сезмаганини тушунтирди:
"Ҳалокат бўйича тергов давом этяпти, бироқ бизда тўловларни ташкил этиш учун етарли маълумот мавжуд. Суғуртачи сифатида биз учун самолётнинг йўқ бўлгани асосий факт ҳисобланади, бу эса шубҳа уйғотмайди. Уруш ва терроризм таваккалчилиги ҳам суғурталангани учун авиакомпания ҳар қандай ҳолатда ҳам компенсация олади", – деди у.
Авиаташувчининг учинчи шахслар олдидаги жавобгарлиги бўйича суғурта шартномаси юзасидан Кабачник қўшимча қилди: "Ерда етказилган зарар бўйича ҳеч қандай даъволар келиб тушмаган ва биз бундай талабларни кутмаяпмиз. Агар шундай бўлса, авиакомпания билан биргаликда белгиланган тартибда ҳаракат қиламиз".
Эслатиб ўтамиз, AZAL авиакомпаниясининг Боку-Грозний йўналиши бўйича парвоз қилган йўловчи самолёти 2024 йил 25 декабрь куни Қозоғистоннинг Оқтау шаҳри яқинида ҳалокатга учраган. Бортда бўлган 67 кишидан 38 нафари ҳалок бўлган, 29 нафари эса омон қолган.
Дастлабки маълумотларга кўра, самолёт Грозний осмонида Россия ҳаво ҳудудида ташқи жисмоний ва техник таъсир сабабли ҳалокатга учраган. Илк таҳлиллар самолёт яқинида Россияга тегишли ракета портлагани боис ҳалокатга учраганини билдирган.
Абдуллоҳ Саййид
