Воқеа 2024 йилнинг 7 ноябр куни Озода Нурсаидованинг "Дилбарим" қўшиғи учун клип суратга олиш жараёнида юз бергае. Бу ҳақда актриса Сабрина Жабборова ўз ижтимоий тармоқларда маълум қилган.
Mercedes-Benz G-класс (“гелик”) бошқарувида вояга етмаган бошқа актриса С.М. бўлган. У ҳам клипда суратга тушаётган бўлган.
С.М оператор ва режиссёр Ш.М.нинг кўрсатмаси билан газ педалини босган ва машина бошқарувини йўқотган. Машинанинг ғилдираклари Сабрина устидан икки марта ўтиб кетган. Натижада Сабринанинг тос суяги синган, бошқа аъзолари оғир жароҳат олган.и
Биринчи ёрдам вақтида кўрсатилмагани натижасида кўп қон йўқотган. Кейин уни 4-сонли касалхонага олиб боришган, 9 соатлик операциядан сўнг беморнинг ҳаёти сақлаб қолинган. Бироқ, жарроҳлик амалиёти нотўғри бажарилгани натижасида, унинг чап оёғи ўнг оёғидан 7 см узунроқ бўлиб, қиз ногирон бўлиб қолган.
Айни вақтда, шифокорлар қизнинг саломатлигини тиклаш учун унинг тос суягини синдириб, суякларни тўғрилаш кераклиги, бундай операциялар жуда камдан кам ҳолатларда мувафаққиятли ўтишини айтган.
Сабрина вояга етмаган қизни суратга олиш жараёнига олиб келган ва унга машина ҳайдашга рухсат берган А.Қни айблаган. Суратга олиш ташкилотчилари ва бошқа айбдор шахслар жабрланувчига етарлича ёрдам кўрсатмаган. Фақатгина 4 ой давомида "филмни суратга олишда техник қоидаларни бузганлиги" учун жарима сифатида 500 доллар тўлаб турган.
Жабрланувчининг онаси Сабринанинг оёққа туришига ёрдам сўраганида, у фақат қуруқ ваъдалар ва таҳдидларни олган. Унга воқеа бўйича материаллар интернетда тарқатилса, жабрланувчига ёрдам бутунлай тўхтатилиши айтилган.
Маълум бўлишича, ушбу ҳодиса бўйича иш судга оширилган, лекин ҳали суд жараёни бошланмаган. Сабрина терговчи унга иш материалларини тақдим қилмаганини айтган.
Шунингдек, Сабрина нормал юриш қобилиятини тиклаш учун чет элда такрорий операция ўтказиши кераклигини айтган ва жамоатчиликдан ёрдам сўраган.
