Тошкент вилояти Пискент туманидаги 50-сон манзил колонияда ходимлар маҳкумни қийноққа солгани аниқланди. Бу ҳақда Олий Мажлиснинг Инсон ҳуқуқлари бўйича вакил Феруза Эшматова матбуот хизмати хабар берди.
Қайд этилишича, маҳкум Т.И. колония ходимлари томонидан қийноққа солиниб, асоссиз интизомий бўлинмага жойлаштирилгани борасида омбудсманга мурожаат қилган.
Ҳолат жойига чиқиб ўрганилганда у туман марказий шифохонасига жойлаштирилгани ҳамда унинг бош ва кўкрак қисмида лат ейиш аломатлари борлиги аниқланган.
Ишга оид ҳужжатларга кўра, маҳкум интизомий бўлинмага 27 февраль куни жойлаштирилган ва уни 10 суткага интизомий бўлинмага киритиб қўйиш ҳақида қарор чиқарилган.
Омбудсман хабарида таъкидланишича, қарор Тошкент махсус прокурори томонидан ўрганилиб, бекор қилинган. Колония маъмуриятининг ҳаракатлари Жиноят-ижроия кодексининг 105-моддаси (Маҳкумларни интизомий жазолаш шартлари) ва 111-моддаси (Қўпол тартиббузарлик тушунчаси) талабларига зид деб топилган.
Маҳкум 6 кун давомида асоссиз равишда интизомий бўлинмада сақланиб, унинг ҳуқуқлари ва эркинликлари бузилган. Шу сабабли, омбудсман қонун талаблари бузилишига йўл қўйган ходимларга чора кўрилишини сўраб Бош прокуратурага назорат хати киритди.
