Тошкент вилояти Янгийўл шаҳридаги 5-сонли давлат боғчаси томига қурилиш кранининг бир қисми қулаб тушди. Бу ҳақда Мактабгача ва мактаб таълими бошқармаси хабар берди.
Қайд этилишича, ҳолат 25 март куни соат 19:10 атрофида содир бўлган. Боғча билан қўшни ҳудудда хусусий тадбиркор қураётган турар жой комплексидаги кўтарма кранининг ўқ (стрела) қисми ёмғир сабабли боғча биносининг томига қулаган.
Бино том қисмига шикаст етган. Воқеа оқибатида жароҳат олганлар бўлмаган.
Ҳодиса жойига ФВБ, ҳокимият, прокуратура, ИИБ мутасаддилари етиб борган. Бино том қисмини зарарлаган кўтарма кран ўқи олиб ташланган.
Айни пайтда қурилиш ташкилотининг 8 нафар ишчиси томдаги зарар етган профнастил қоплама ва ёғоч қисмини олиб ташлаб, таъмирлаш ишларини бошланган. Ташкилот бино ишчи ҳолатга келтирилиши учун 3 кун кетишини билдирди.
Боғча фаолияти бир муддатга тўхтатилган.
