Ҳодиса 2024 йилнинг 17 декабрида Паркент туманидаги хусусий ҳайвонот боғида содир бўлган эди. Қафасдан чиқиб кетган 3 та Африка шерини жойига қайтаришга уринган 44 ёшли қоровул уларнинг ҳужумига учраган ва вафот этган эди.
Ҳолат ҳайвонот боғи ходимлари томонидан орадан 4 соат ўтиб илғаб қолинган ва 2 та шер ухлатувчи дори воситалари қўлланган ҳолда катакка қайтарилган. 1 та шер эса маҳаллий овчи томонидан отиб ўлдирилган.
Мазкур ҳолат юзасидан қўзғатилган жиноят иши ЖИБ Паркент тумани судида кўриб чиқилди. Суд ҳайвонот боғи директорини Жиноят кодексининг 257-моддаси 2-қисмида назарда тутилган жиноятни содир этганликда айбдор деб топди ва унга ушбу моддага асосан уч йил муддатга озодликни чеклаш жазоси тайинланди.
Қамоққа олиш эҳтиёт чораси бекор қилиниб, у дарҳол суд залида қамоқдан озод қилинди.
