Ижтимоий тармоқларда Абдуллоҳ (Қори ака) тахаллуси билан танилган, Тошкент вилоятида яшовчи 26 ёшли шахс тармоқлардаги саҳифаларида Ўзбекистон фуқароларига нисбатан ҳақоратли чиқишлар қилиб юргани сабабли қўлга олинди. Бу ҳақда Ички ишлар Бош бошқармаси ахборот хизмати маълум қилди.
“Блогер 2024 йилнинг октябрь-ноябрь ойларида Корея Республикасида бўлиб турган вақтида ўзининг ижтимоий тармоқлардаги оммавий саҳифалари орқали миллатлараро низо келтириб чиқариши мумкин бўлган, миллий қадр-қимматни таҳқирловчи ҳамда диний эътиқодига кўра, фуқароларни камситувчи сўзлар билан Ўзбекистон фуқароларига нисбатан қатор ҳақоратли чиқишлар қилиб борган”, — дейилади хабарда.
Қайд этилишича, Абдуллоҳнинг тармоқлардаги чиқишлари жамоатчиликнинг кескин норозилигини келтириб чиқариб, кўплаб салбий муҳокамаларга сабаб бўлган.
Олинган маълумотга асосан ушбу шахс жорий йилнинг 25 март куни Абу-Даби Самарқанд Airways орқали Ўзбекистон ҳудудига келтирилиб, ҳуқуқ-тартибот органлари ходимлари томонидан процессуал тартибда ушланган. Ҳамда унга нисбатан қамоққа олиш тарзидаги эҳтиёт чораси қўлланган.
Сўнг блогернинг ўзи ҳам айбига иқрор бўлиб, қилган ишидан қаттиқ пушаймонда эканлигини айтган.
“Мен Жигаев Валерий ижтимоий тармоқда халқимизни ҳақорат қилганман. Мен ҳамма ишимни “актив” учун, танилишим учун қилган эдим. Ҳозир айбимни тушуниб етдим. Қилган ишимдан жуда қаттиқ пушаймонман. Ҳаммадан чин қалбимдан кечирим сўрайман”,— дейди у.
Юқоридаги ҳолат юзасидан фуқаро Й.В.га нисбатан Жиноят кодексининг тегишли моддалари билан жиноят иши қўзғатилиб, тергов ҳаракатлари олиб борилмоқда.
