Тошкентда метрополитен ходимини қўрқитиб, ундан пул ундириб юрган шахс қўлга олинди. Бу ҳақда “Тошкент метрополитени” ДУК матбуот хизмати хабар берди.
Маълум қилинишича, “Режим тартибини таъминлаш” хизмати ходимлари томонидан фуқаро М.А. метронинг “Қўйлиқ” бекати навбатчиси А.А. нинг шахсий ҳаётига таҳдид қилиб, зўравонлик йўли билан уни қўрқитиб ундан 500 минг сўм пулни талаб қилганлиги тўғрисида маълумот олинган.
Натижада, 2025 йил 10 апрель куни ИИВ Метрополитенда хавфсизликни таъминлаш бошқармаси ходимлари томонидан “Тошкент метрополитени” ДУК “Режим тартибини таъминлаш” хизмати билан ҳамкорликда ўтказилган тадбирда фуқаро М.А. метрополитеннинг “Ҳаракат” хизмати бекат навбатчиси А.А. дан “Қўйлиқ” метро бекатида товламачилик йўли билан навбатдаги 500 000 минг сўм пулни олган вақтда ашёвий далиллар билан қўлга олинди.
Қайд этилишича, мазкур фуқаро аввал ҳам ЖКининг 166-модда (талончилик) ва 169-моддалари (ўғирлик) билан судланган.
Ҳозирда, М.А. ҳуқуқни муҳофаза қилувчи органлар томонидан ўрнатилган тартибда ҳибсга олинган.
