Трамп маъмурияти “Harvard”университетига соғлиқни сақлаш соҳасидаги тадқиқотлар учун ажратилган миллиард долларга яқин маблағни беришни тўхтатмоқчи. Бу ҳақда “ДW” нашри маълум қилди.
Қайд этилишича, Оқ уй университет маъмуриятининг АҚШ ҳукумати томонидан юборилган 11 апрель кунги мактубни ошкора эълон қилганидан ҳайратга тушган.
Трамп маъмурияти дастлаб университетга нисбатан юмшоқроқ муносабатда бўлишни истаган, бироқ мактуб эълон қилингач, расмийлар “Harvard”га нисбатан босимни кучайтиришга қарор қилган.
Университет март ойининг охиридаёқ Трамп маъмуриятига мурожаат қилган ва қарама-қаршиликдан қочишга ҳаракат қилган.
“Harvard” кампусларида антисемитизмга қарши чора-тадбирлар аллақачон кўрилган. Бироқ 11 апрель кунги мактубда келтирилган талаблар бундан анча кескинроқ бўлган ва унверситет раҳбарияти бу талабларни қабул қила олмаслигини билдирган.
Нашрда қайд этилишича, мактубда махфийлик белгиси бўлмаган. Трамп маъмурияти АҚШдаги етакчи университетларга, жумладан “Harvard”га, антисемитизмга қарши кураш баҳонасида босим ўтказмоқда.
Мактубда “Harvard”нинг бошқарув тизимини ислоҳ қилиш, қабул сиёсатини ўзгартириш, раҳбарият ва ўқитувчиларнинг қарашларини текшириш, кампус ҳудудида ниқоб тақишни тақиқлаш каби талаблар мавжуд бўлган.
