Эроннинг Теҳрон вилоятига қарашли Исломшаҳр шаҳрида эркак ўзининг 18 ёшли қизи Фотима Султонийни гўзаллик салонида ишлаётганини билиб қолганидан сўнг омма олдида пичоқлаб ўлдирди. Бу ҳақда Эроннинг “IranWire” мухолифат нашри хабар берди.
Нашр манбаларига кўра, Султоний отасининг салбий муносабатидан қўрққани учун гўзаллик салонида яширинча ишлай бошлаган. Айтилишича, эркак илгари ҳам хотини ва қизига нисбатан мунтазам зўравонлик қилган.
У гўзаллик салонининг манзилини қизининг Instagram саҳифасида қолдирилган бронь қилиш учун телефон рақами орқали аниқлаган. Жорий йил 18 апрель куни эрталаб у салонга борган. Султоний отасини кўриб қолиб, онасига қўнғироқ қилишга улгуради.
Аёллар ҳуқуқларини ҳимоя қилувчи фаол Пардис Робий ижтимоий тармоқлардаги саҳифаларида воқеа гувоҳларининг сўзларини келтирган. Улар эркакнинг салон ичига кириб, қизини мижозлар ва ходимлар кўз ўнгида бир неча марта пичоқлагани, сўнг унинг бошини кесмоқчи бўлгани, аммо атрофдагилар бақиргач, қочиб кетганини айтган. Шундан сўнг у хотинига қўнғироқ қилиб, “Мен сени бу ғам билан қолдираман”, деган.
Бошқа бир мухолиф нашр – HRANA маълумотига кўра, эркак қўлга олинган ва унга нисбатан жиноят иши қўзғатилган.
“IranWire”нинг “Etemad” газетасига таяниб ёзишича, 2023 йил мартдан сентябригача бўлган даврда Эроннинг ўзида қариндошлар ёки оила аъзолари томонидан 78 аёл ўлдирилган. “Shargh” газетаси маълумотига кўра, 2021 йилдан 2023 йилгача камида 165 аёл ўз оиласи ичида эркаклар томонидан ўлдирилган.
