Ҳиндистон Покистондан келадиган ёки унинг ҳудуди орқали ўтадиган товарлар импортини тақиқлади. Бу ҳақда Реутерс хабар берди.
Ҳиндистон ташқи савдо бош бошқармаси тақиқ дарҳол кучга киришини маълум қилди. Покистон кемаларининг мамлакатга киришига ҳам рухсат берилмайди.
Ушбу чеклов Ҳиндистон манфаатлари, жамоат хавфсизлиги ва юк ташиш инфратузилмасини ҳимоя қилиш мақсадида қабул қилинди, — дейилади хабарда.
Покистон бундан аввалроқ барча чегара савдоларини тўхтатиб, Ҳиндистон авиакомпаниялари учун ҳаво ҳудудини ёпган эди.
Маълумот учун, икки давлат ўртасидаги муносабатлар жорий йилнинг 22-апрель куни Кашмирдаги терактдан сўнг кескинлашди. Бир нечта қуролланган шахс Паҳалгам шаҳри яқинида маҳаллий аҳоли ва сайёҳларга қарата ўт очган. Оқибатда 25 нафар ҳиндистонлик ва бир Непал фуқароси ҳалок бўлган.
Ҳужум учун жавобгарликни террорчи ташкилот ҳисобланган “Лашкари Тайба” билан боғлиқ “Қаршилик фронти” гуруҳи ўз зиммасига олган. Ҳиндистон ҳужумни Покистон билан боғлаган. Айбланган давлат ҳужумчилар билан алоқадорлигини қатъиян рад этган.
Шундан сўнг Ҳиндистон Покистонга қарши кескин чоралар кўрган. Жумладан, қуруқликдаги Аттари назорат-ўтказиш пункти ёпилган. Покистонликларга мамлакатни тарк этиш топширилган.
