2025-йилги Ҳаж мавсумининг илк зиёратчилари бугун, 13 май куни, Тошкент халқаро аэропортидан Саудия Арабистонининг муқаддас заминига жўнаб кетишди. Ўзбекистонлик ҳожиларнинг илк гуруҳи шу тариқа муборак ҳаж сафарини бошлаганини Ўзбекистон мусулмонлари идораси матбуот хизмати маълум қилди.
Зиёратчиларни кузатиш маросими тантанали руҳда ўтди. Тадбирда Ўзбекистон мусулмонлари идораси раиси, муфтий Шайх Нуриддин Холиқназар ҳазратлари, Дин ишлари бўйича қўмита, таниқли уламолар, имом-хатиблар, масъул ташкилотлар вакиллари ҳамда оммавий ахборот воситалари ходимлари иштирок этдилар.
Муфтий ҳазратлари ҳожилар сафар олдидан хайрли дуо қилиб, Аллоҳ таолонинг байти сари йўл олаётган юртдошларимизнинг Ҳаж амалларини эсон-омон адо этиб, соғ-саломат юртга қайтишларини тиладилар.
Мазкур воқеа билан “Ҳаж – 2025” мавсумига расмий тарзда старт берилди. Ҳаж сафарига отланган юртдошларимиз қалбларида чуқур ҳаяжон ва орзу-умид билан Саудия Арабистонига парвоз қилдилар.
