Сурия расмийлари Башар Асад даврида жорий этилган АҚШ санкцияларининг бекор қилиниши эвазига Америка компанияларига мамлакатдаги табиий ресурсларни ўзлаштириш имконини беришга тайёр. Бу ҳақда манбаларга таяниб, “The Times” нашри хабар берди.
Нашрга кўра, АҚШ Президенти Дональд Трамп шу кунларда бўладиган Яқин Шарқ сафарида Саудия Арабистонида Сурия муваққат президенти Аҳмад аш-Шара билан учрашиши мумкин.
Манбаларнинг таъкидлашича, янги Сурия етакчиси Иброҳим шартномасига қўшилиши бўйича музокараларни бошлашга ҳам тайёр. Мазкур дипломатик ташаббус орқали Исроил ўз муносабатларини БАА, Баҳрайн, Марокаш ва Судан каби араб давлатлари билан нормаллаштирган. Бундан ташқари, аш-Шара Исроилнинг Сурия жануби-ғарбий чегарасида – Жўлон тепаликлари ҳудудида доимий ҳарбий мавжудлигига рози бўлишга ҳам тайёр.
Суриянинг АҚШ билан стратегик ҳамкорлик битими тузмоқчи экани, жумладан, табиий ресурсларга киришни таъминлаш бўйича маълумотни “Reuters” ҳам тасдиқлаган. Америкалик тадбиркор Жонатан Басс 30 апрель куни Аҳмад аш-Шара билан учрашганини айтиб, муваққат президент мамлакат келажаги учун бундай битим зарур, деб ҳисоблашини маълум қилган.
“У (аш-Шара) Дамашқда Trump Tower қурилиши ҳақида гапирди ва қўшнилар билан тинчликка тайёрлигини билдирди”, деган Басс.
“Reuter” билан суҳбатлашган ва Трампнинг минтақавий ташрифи логистикасидан хабардор манбанинг айтишича, АҚШ ва Сурия вакиллари ўртасида учрашув режалаштирилган, бироқ Трампнинг аш-Шара билан бевосита музокара олиб бориши ҳозирча тасдиқланмаган. Бошқа бир манбанинг айтишича эса, бу каби учрашув ҳали ҳам эҳтимолдан холи эмас.
