Франция президенти Эммануэл Макроннинг айтишича, агар Россия Украинада 30 кунлик сулҳга рози бўлмаса, Европа Иттифоқи АҚШ билан келишилган ҳолда унга қарши янги санкцияларни жорий этиши мумкин. Бу ҳақда у TF1 телеканалига берган интервьюсида маълум қилди.
Макрон сулҳ зарурлигини таъкидлаб, бу орқали “ҳудудий масалаларни ҳал қилишга ёрдам берадиган музокаралар”ни бошлаш мумкинлигини қайд этди.
Шу билан бирга, у “ҳатто украиналикларнинг ўзи ҳам 2014 йилдан буён йўқотилган барча ҳудудларни қайтариб олиш мумкин эмаслигини тушуниб туришади”, — дейди.
Франция президентига кўра, тинчлик битими имзоланганидан сўнг, БМТ тинчликпарвар кучлари ёки хавфсизликни таъминловчи миссияларни жойлаштириш масаласи кўтарилиши мумкин. Уларнинг вазифаси — “фронт чизиғидан узоқ ҳудудларда жойлашиб, Россияни можарони давом эттиришдан тийиб туриш” бўлиши керак.
Шунингдек, Макрон асосий хавфсизлик кафолати сифатида “кучли украин армияси” бўлиши лозимлигини алоҳида таъкидлаган.
