Германия иқтисодиётидаги суст ўсиш ҳамда фуқаролар учун жорий этилган солиқ имтиёзлари туфайли давлат бюджетига кутилганидан 33 миллиард еврога кам маблағ тушади. Бу ҳолат Берлинни яқин йилларда молиявий режалаштиришни қайта кўриб чиқишга мажбур қилмоқда.
Германия Иқтисодиёт вазирлигининг янги прогнозига кўра, 2029 йилгача мамлакат федерал бюджетига тушадиган солиқ тушумлари аввалги ҳисоб-китобларга қараганда 33,3 миллиард еврога кам бўлади. Бутун давлат сектори, яъни федерал даража, ерлар ва маҳаллий ҳокимиятлар бўйича умумий йўқотиш 81,2 миллиард еврони ташкил қилиши кутилмоқда.
Солиқ тушумларининг пасайишига икки асосий омил сабаб бўлмоқда:
1. Фуқаролар учун янги солиқ имтиёзларининг жорий этилиши;
2. Иқтисодий ўсиш суръатларининг пасайгани сабабли компаниялар камроқ фойда солиғи тўлаяпти.
2025 йилда Германия иқтисодиёти умуман ўсмаслиги, 2026 йилда эса бор-йўғи 1 фоизга ўсиши прогноз қилинмоқда. Бу ҳақда Иқтисодиёт вазирлиги апрель ойида маълум қилган эди.
Мамлакатнинг янги молия вазири Ларс Клингбайл бундай вазиятда ягона ечим сифатида иқтисодий ўсишни жадаллаштиришни кўриб чиқмоқда:
“Бизга янги молиявий маневрлар учун имкониятлар керак. Бунга фақат иқтисодий ўсиш ҳисобига эришиш мумкин. Шу сабабли ҳозир биз Германияда сўнгги ўн йилликларда кузатилмаган энг кенг кўламли модернизацияни бошлаяпмиз”, — дейди у.
Германияда бюджет мувозанатини сақлаш бўйича қатъий сиёсат юритилаётгани инобатга олинса, бу молиявий танқисликлар ҳукумат учун жиддий муаммо туғдириши мумкин. Эндиликда Берлин қаттиқ иқтисодий интизом ва таркибий ислоҳотлар ўртасида мувозанат топишга мажбур бўлади.
