Кеча, 18 май куни кечқурун Германия, Франция, Буюк Британия ва Италия раҳбарлари АҚШ президенти Доналд Трамп билан Украина бўйича музокара ўтказди.
Германия ҳукумати расмий вакили Штефан Корнелиусга кўра, Трамп ва Россия президенти Владимир Путин ўртасидаги суҳбатдан кейин бу масалада фикр алмашинуви яна давом этади. Трамп ва Путин Бугун, 19 май куни гаплашади.
Буюк Британия бош вазири Кеир Стармер матбуот хизматининг маълум қилишича, суҳбатда Украина уруши ва бу уруш ҳар икки томон учун қандай оғир оқибатларга олиб келаётгани муҳокама қилинган. Агар Россия ўт очишни тўхтатиш ва тинч музокараларга жиддий ёндашмаса, унга қарши янги санкциялар қўлланиши ҳам кўриб чиқилмоқда.
Франция президенти Эммануэл Макрон эса Х (аввалги Twitter) тармоғида шундай ёзди: "Эртага президент Путин тинчлик истаётганини кўрсатиши керак. У АҚШ президенти Трамп таклиф қилган ва Украина ҳамда Европа қўллаб-қувватлаган 30 кунлик шартсиз ўт очмаслик режимига рози бўлиши лозим."
Аввалроқ Трамп 19 май куни Путинга қўнғироқ қилмоқчи экани, кейин эса Украина президенти Зеленский ва НАТО аъзолари билан ҳам мулоқот қилмоқчи экани ҳақида айтган эди. Унинг айтишича, асосий мавзу — “ҳар ҳафта ўртача 5000 нафардан ортиқ россиялик ва украиналик аскарнинг ҳалок бўлишига сабаб бўлаётган қонли урушни тўхтатиш ҳамда савдо алоқаларини тиклаш” бўлади.
