Европарламент Грузиядаги сиёсий вазият юзасидан кескин баёнот билан чиқди. Депутатлар 2024 йил октябрь ойида ўтган парламент сайловларини ноқонуний деб атар экан, уларнинг натижасида ҳокимиятдаги “Грузин орзуси” партияси давлат институтларини тўлиқ назоратга олгани, репрессив қонунчилик жорий этгани ва сиёсий мухолифат, журналистлар ҳамда тинч намойишчиларни шафқатсиз таъқиб қилаётгани таъкидланди.
Ҳужжатда Евроиттифоқ мамлакатларидан “Грузин орзуси” партиясининг асосий раҳбарларига ва сиёсий репрессияларга масъул бўлган шахсларга нисбатан шахсий санкциялар жорий этилиши тавсия этилган. Шунингдек, Грузияда янги, халқаро кузатувчилар иштирокида очиқ ва адолатли сайловлар ўтказишга чақирилган.
“Демократиядан узоқлашув давом этаётганини инобатга олиб, Европарламент Евроиттифоқнинг Грузияга нисбатан олиб бораётган сиёсатини тўлиқ қайта кўриб чиқишга, шунингдек, Грузия билан имзоланган ассоциация битими ижросини таҳлил қилишга чақиради”, — дейилади парламент ҳисобот лойиҳасида.
Литвалик Европарламент аъзоси Раса Юкнявичене эса Грузиядаги вазиятни “Россия манфаатлари мамлакатни бирорта ҳам ўқ узмасдан ичкаридан забт этганининг яққол намунаси” деб атади.
“Аммо грузин халқи таслим бўлмаяпти. Улар 200 кундан буён кўчаларда — репрессияларга қарамай. Биз, Евроиттифоқ, эркин ва Европага интилаётган жасур грузин халқига қарздормиз. Ҳаракат қилиш вақти келди — кеч бўлишидан олдин”, — деди у.
