АҚШ Президенти Дональд Трамп мамлакат хавфсизлигини таъминлаш мақсадида 12 та давлат фуқароларига тўлиқ, 7 та давлат фуқароларига эса чекланган тартибда АҚШ ҳудудига киришни тақиқловчи янги қарорни имзолади. Бу ҳақда “DW” нашри ёзмоқда.
Тўлиқ кириш тақиғи қуйидаги давлатлар фуқароларига нисбатан жорий этилди:
Афғонистон, Мянма, Чад, Конго Республикаси, Экваториал Гвинея, Эритрея, Гаити, Эрон, Ливия, Сомали, Судан ва Яман.
Қисман тақиқ қуйидаги давлатларга нисбатан қўлланилади:
Бурунди, Куба, Лаос, Серра-Леоне, Того, Туркманистон ва Венесуэла.
Ушбу мамлакат фуқароларига эндиликда АҚШга меҳмон ёки талаба визалари асосида кириш тақиқланади. Бироқ иш визалари ёки АҚШ фуқароси бўлган қариндошларини бирлаштириш мақсадидаги визалар амалда қолади.
Мазкур чоралар Трампнинг президентлик даврида аввал ҳам жорий этилган эди. Бироқ бу сафар тақиқланганлар рўйхатига Сурия ва Шимолий Корея киритилмади.
Президент Трампнинг таъкидлашича, ушбу қарор Колорадо штатининг Боулдер шаҳрида рўй берган сўнгги ҳужумдан сўнг қабул қилинди. Аниқланишича, АҚШда ноқонуний яшаётган ва оилали бўлган 45 ёшли Миср фуқароси яҳудий фаоллар тўпланган жойда “Фаластинга озодлик!” деган чақириқ билан ёнувчи модда улоқтирган.
“XXI асрда биз визаси муддати ўтган ёки хавфли минтақалардан келган хорижликлар томонидан амалга оширилган террор ҳужумларига гувоҳ бўлдик. Мен Европада юз берган воқеаларнинг Америкада такрорланишига йўл қўймайман,” — дейди АҚШ Президенти.
У, шунингдек, ушбу рўйхатга янги давлатлар ҳам қўшилиши мумкинлигини маълум қилди.
