Европа Иттифоқи Россияга қарши санкцияларнинг янги босқичини эълон қилди. “Еврокомиссия” раҳбари Урсула фон дер Ляен Брюсселда ўтказилган матбуот анжуманида хабар қилишича, Россия нефтининг нарх чегараси 60 доллардан 45 долларгача туширилади. Шу билан бирга, Россия хом нефтини қайта ишлаш маҳсулотларининг импорти ҳам тақиқланади.
Янги пакет доирасида Россиянинг 77 та “соя флоти” кемасига қарши санкциялар жорий қилинади. Бундан ташқари, “SWIFT” тизими орқали транзаксияларни чеклаш мақсадида яна 22 та россиялик ва хорижий банк қора рўйхатга киритилади.
Фон дер Ляеннинг таъкидлашича, Россиянинг ҳарбий йўналишга боғланган иқтисодий модели глобал хавфсизликка таҳдид солмоқда. “Россия фақат куч тилини тушунади. Бу уруш тугаши керак ва Москва музокара столига жиддий ният билан ўтириши шарт”, — дейди у.
Нефть нархини пасайтириш бўйича қарор G7 давлатларининг якдиллиги билан кучга киради. АҚШ билан ҳамкорликда ҳаракат қилинганда, санкцияларнинг таъсири сезиларли даражада ортиши кутилмоқда.
Янги чоралар Евроиттифоқнинг Россияга нисбатан босимини ошириш ва ҳарбий ҳаракатларни иқтисодий жиҳатдан тўхтатишга уринишининг навбатдаги босқичи сифатида баҳоланмоқда.
