Жорий йилнинг 9 июнь куни Бирлашган Араб Амирликлари вице-президенти ва Бош вазири шайх Муҳаммад бин Рашид Ал Маҳдум Дубай метросининг 74 метрлик “Мовий” линияси қурилиши учун тамал тошини қўйди. Бу ҳақда “Khaleej Times” хабар берди.
Dubai Creek Harbor ҳудудида жойлашадиган бекат Emaar Properties Station деб номланади. У 11 минг квадрат метр майдонни эгаллайди ва кунига 160 минггача йўловчини қабул қила олади. Лойиҳа қиймати 56 миллиард дирҳам бўлиб, умумий узунлиги 30 километрни ташкил этади. Шундан 15,5 километри ер остидан, 14,5 километри эса ер устидан ўтади.
Станциялар замонавий қулайликлар билан таъминланади. Улар орасида велосипед ва электроскутерлар учун майдончалар, такси тўхташ жойлари ҳамда автобус бекатлари бўлади. Dubai Creek Harbor ҳудудидаги станция шаҳарнинг муҳим архитектура ва транспорт марказларидан бирига айланиши кутилмоқда.
Дубай метроси Форс кўрфази мамлакатларидаги биринчи ўта замонавий, дунёдаги энг узун, тўлиқ автоматлаштирилган ва ҳайдовчисиз тезюрар поездлар тармоғи ҳисобланади. Бундан ташқари, у арзон ва қулай ҳаракатланиш усули бўлиб, мегаполиснинг барча диққатга сазовор жойларига қулай саёҳатларни таъминлайди. Ҳар ойда 5 миллион сайёҳ ва маҳаллий аҳоли тезюрар поездлар хизматидан фойдаланади.
Ушбу линия 2029 йилда фойдаланишга топширилиши режалаштирилган. Шундан сўнг Дубай метросининг умумий узунлиги 131 километрга, станциялар сони эса 78 тага етади.
Янги линия ҳар куни 320 минг йўловчига хизмат кўрсатиши ва шаҳарнинг асосий ҳудудлари бўйлаб транспорт алоқаларини сезиларли даражада яхшилаши кутилмоқда.
