Ўзбекистон Республикаси Президенти Шавкат Мирзиёев Аҳмадобод шаҳри ҳудудида юз берган авиаҳалокат оқибатида кўплаб инсонлар ҳалок бўлгани ва жиддий жароҳат олгани муносабати билан Ҳиндистон Республикаси Президенти Драупади Мурму ва Бош вазири Нарендра Модига таъзия мактуби йўллади. Бу ҳақда Президент матбуот хизмати хабар берди.
Давлатимиз раҳбари қурбон бўлганларнинг оила аъзолари ва яқинларига, бутун Ҳиндистон халқига чуқур ҳамдардлик изҳор этди, жароҳат олганлар тез фурсатда соғайиб кетишини тилади.
Ўзбекистон Ташқи ишлар вазирлиги олинган дастлабки маълумотларга кўра, мазкур рейсда Ўзбекистон фуқаролари бўлмаганини маълум қилди.
12 июнь куни Аҳмадобод шаҳридан Лондонга учаётган Air India компаниясининг Boeing 787 Dreamliner йўловчи самолёти парвоздан кўп ўтмай ҳалокатга учради.
Самолёт бортида 242 киши, жумладан, 2 учувчи ва 10 стюардесса бўлган, деб ёзади Times of India. Қулаш жойида қутқарув операцияси олиб борилмоқда.
