Америка Қўшма Штатлари Эрон билан тўғридан-тўғри уруш ҳолатида эмас. Буни АҚШ витсе-президенти Жей Ди Венс расман маълум қилди.
“Биз Эрон билан урушда эмасмиз. Биз Эроннинг ядровий дастурига қарши курашяпмиз”, — деди у “NBC News”телеканалига берган интервьюсида.
Бу баёнот АҚШнинг Эрон ҳудудидаги ядровий объектларга берган зарбасидан сўнг янгради.
Бироқ витсе-президент Эрон ядровий иншоотларининг тўлиқ йўқ қилинганига 100 фоиз кафолат бера олмаслигини тан олди.
“Мен Эрон ҳудудида нима кўрганимиз ҳақида махфий разведка маълумотларига тўлиқ тўхталмоқчи эмасман. Бироқ биз кўп нарсани кўрдик. Ишончим комилки, бу ҳужум Эроннинг ядровий қурол яратиш ҳаракатларини жиддий даражада кечиктирди. Бу айнан бизнинг асосий мақсадимиз эди”, — дея таъкидлади Жей Ди Венс.
Эслатиб ўтамиз, сўнгги ҳафталарда Эрон ва АҚШ ўртасидаги зиддият кескинлашгани кузатилмоқда. АҚШнинг Эрон ҳудудидаги ядровий объектларга зарба бериши минтақадаги геосиёсий тарангликни янада кучайтириши мумкин.
