Хитойнинг Гонконгдаги сиёсий босими натижасида мамлакатдаги охирги продемократик сиёсий тузилма — Социал-демократлар лигаси фаолиятини тўхтатди. Бу ҳақда ташкилот раҳбари Чан По Ин оммавий ахборот воситаларига маълум қилган.
Партия аъзоларининг айтишича, улар узоқ йиллардан буён сиёсий эркинлик учун кураш олиб борган, бироқ 2020 йилда кучга кирган миллий хавфсизлик тўғрисидаги қонун уларга босимни кескин кучайтирган. Қонун қабул қилинганидан сўнг Гонконгда Пекинга қарши уюштириладиган ҳар қандай чиқишлар “террорчилик”, “ажралиб чиқишга даъват” ёки “давлатга қарши ҳаракатлар” деб баҳоланмоқда.
Маълумот учун, 2024 йилда қонун янада кучайтирилди: унга кўра, давлатга қарши ҳар қандай ҳаракат умрбод қамоқ жазосигача олиб келиши мумкин.
Социал-демократлар лигасининг тарқатилиши билан Гонконгда расмий мухолифат буткул йўқолди. Айтиш керакки, бу сўнгги икки йил ичида ўзини ўзи тарқатган учинчи сиёсий партия бўлди.
Эслатиб ўтамиз, Гонконг 1997 йилгача Буюк Британия мустамлакаси бўлган ва унга нисбатан “бир давлат – икки тизим” сиёсати амал қилган. Аммо сўнгги йилларда Пекин ушбу эркинликларни босқичма-босқич йўққа чиқармоқда.
