Полшанинг Киевдаги консулхонаси Россия ҳужуми вақтида зарар кўрди. Бу ҳақда Anadolu Ajansi хабар берди.
"Кеча кечқурун Россия томонидан амалга оширилган кенг кўламли ҳужум ёнғинларга ва катта талафотларга сабаб бўлди, шу жумладан Киевдаги Полша консулхонасига ҳам зарар етказилди", — деб ёзди Полша ташқи ишлар вазири Радослав Сикорский Х ижтимоий тармоғида.
"Президент Трамп, Путин сизнинг тинчликка эришиш ҳаракатларингиз устидан кулмоқда. Илтимос, Украинага зенит ўқ-дорилар етказиб беришни тикланг ва агрессорга нисбатан янги қатъий санкциялар жорий қилинг", — дея қўшимча қилди Сикорский.
Эслатиб ўтамиз, Россия Киевга кенг кўламли зарбалар йўллади. 20 дан ортиқ киши яраланган.
Россия Қуролли кучлари 4 июль куни эрта тонгда Украинага ракеталар ва дронлар ёрдамида кенг кўламли ҳужум уюштирди. Украина Ҳаво кучлари маълумотларига кўра, ҳужумда 539 та дрон ҳамда 11 та ракетадан фойдаланилган. Асосий йўналиш пойтахт Киев бўлган. Украина ҳарбийлари 476 та дрон ва “Искандер-К” мажмуасидан учирилган 2 та қанотли ракетани зарарсизлантирганини қайд этмоқда.
Сўнгги маълумотларга кўра, зарбалар оқибатида 23 киши яраланган, шулардан 14 нафари шифохонага ётқизилган. Мамлакат ИИВ Игор Клименконинг сўзларига кўра, зарбалар натижасида пойтахтдаги турар жой бинолари, таълим, тиббиёт ва транспорт инфратузилмасига шикаст етказилган.
