Пойтахт Тошкент яна бир марта сохта “усталар” билан боғлиқ шов-шувли воқеага гувоҳ бўлди. Бу сафар ДХХ ва ИИВ ходимлари томонидан Учтепа туманидаги “Автомобиль эҳтиёт қисмлари” бозорида фаолият юритиб келган 12 кишилик жиноий гуруҳ фош этилди.
Улар ким? Оддий тил билан айтганда – устахона ортида товламачилик билан шуғулланган “бизнесменлар”. Қанча одамнинг машинасини “ремонт қиламиз” деб олиб, кейин эса розилигисиз эҳтиёт қисмлар ўрнатган. Қанча одамга “600 долларлик иш учун 13 300 доллар берасан” деб дағдаға қилган.
Яхши хизмат кўрсатмаган – қўрқитган. Яхши тил билан нарх айтмаган – калит олиб, тазйиқ қилган. Яхши усталик қилмаган – сохта хизматни уч баробар нархда сотган.
Энг ёмони: ҳаққини сўраган мижозга таҳдид қилишган. Яна бир ҳолатда – одамнинг машинасига ўзлари билганча деталь ўрнатиб, 15 миллион сўм сўрашган. Калитни бермай, босим қилишган. Бу ҳали ҳаммаси эмас.
Иккита бошқа фуқародан 70 миллион сўм олиб, ваъда қилинган ишни ҳам бажармаганлар. Бу энди оддий усталик эмас – бу очиқдан-очиқ “авторитетлик” устахонаси.
Ҳозирда барча гумондорлар ушланган. Уларнинг ҳаракатлари юзасидан тергов ҳаракатлари олиб борилмоқда. Давлат хавфсизлик хизмати ва Ички ишлар вазирлиги ушбу ҳолат юзасидан фуқароларни огоҳ бўлишга чақирмоқда.
