АҚШ Президенти Доналд Трамп жорий йилнинг 1 август кунидан Канададан олиб кириладиган барча маҳсулотларга 35 фоиз бож солиғи жорий этилишини эълон қилди. Бу ҳақда АҚШ раҳбари ўзининг Truth Social ижтимоий тармоғида ёзиб қолдирди.
Қайд этилишича, Трамп ушбу қарор Канадани АҚШ билан ҳамкорлик қилмагани ва ўз ставкаларини эълон қилгани учун жорий этилганини билдирган.
“Канада АҚШ билан ҳамкорлик қилиш ўрнига ўзининг бож ставкаларини киритди. Шу сабабли, 1 августдан бошлаб биз Канададан АҚШга олиб кириладиган маҳсулотларга алоҳида 35 фоиз бож солиғини қўллаймиз – бу бошқа соҳаларга тегишли божлардан ташқари”,— дея ёзган АҚШ раҳбари.
Маълумот учун, АҚШ, Канада ва Мексика ўртасида тузилган савдо битимига кирмаган Канададан олиб кириладиган товарларга аввал 25 фоиз бож солиғи мавжуд эди.
Шунингдек, қувват маҳсулотларига 10 фоиз бож солиғи қўлланилган. Қолаверса, Трамп 2025 йилнинг июнь ойи охирида Канада билан барча савдо музокараларини тўхтатганини эълон қилган.Сабаб – Канаданинг рақамли хизматлар солиғини жорий қилиши. Бу солиқ 30 июнь куни кучга кириши керак эди.
Канада ҳукумати эса бунга жавобан муайян пўлат турларига квоталар жорий этди ҳамда квотадан ортиқ импорт қилинадиган пўлатга 50 фоизлик қўшимча бож белгилади.
Шу билан бирга, Канада Молия вазири бу чораларнинг “АҚШнинг ноҳақ бож сиёсатига қарши” чоралар эканини айтди ва улар миллий саноатни ҳимоя қилишга қаратилганини таъкидлади.
