“Тhe Washington Post” маълумотига кўра, Дональд Трамп 11 июль куни Украина учун узоқ масофали Tomahawk ракеталарини етказиб бериш масаласини кўриб чиққан. Бу ракеталар аввал АҚШ томонидан Эрон ҳудудига зарба беришда ишлатилган. Бироқ, якуний қурол рўйхатига улар киритилмаган.
Нашрга кўра, Трамп ўтган ҳафта Зеленский билан суҳбат чоғида: “Нега сизлар Москвага зарба бермайсизлар?” деган саволни берган.
Зеленский эса бунга: “Агар сиз бизга керакли қуролни берсангиз, биз зарба бера оламиз”, деб жавоб берган. Трамп, ўз навбатида, Россияга босимни кучайтириш учун Санкт-Петербургни ҳам нишонга олиш мумкинлигини айтган.
Бундан ташқари, Пентагон манбасининг хабар беришича, АҚШ яқин орада Украина ихтиёридаги ATACMS ракеталарини тўлиқ масофага — 300 кмгача ишлатишга рухсат бериши мумкин.
Бу масофа Москвани нишонга олиш учун етарли бўлмаса-да, Россиядаги ҳарбий базалар ва аэродромларга зарба бериш имконини беради.
