Бурса вилоятининг Орҳанели туманида авж олаётган ўрмон ёнғинини ўчириш ишлари давом этмоқда. Кучли шамол оловни қайта кучайтирди, бир нечта қишлоқлар эвакуация қилинди. Бу ҳақда TRT хабар ёзмоқда.
Туркиянинг ғарбий ҳудудида жойлашган Бурса вилоятининг Орҳанели туманидаги Якуплар маҳалласида 27 июль куни тушдан кейин бошланган ўрмон ёнғини кучли шамол таъсирида 28 июль эрталаб яна авж олди.
Расмийларга кўра, ўрмон хўжалиги ва ёнғин хавфсизлиги бўлинмалари ҳаво ва ер орқали оловга қарши курашмоқда. Бироқ шамолнинг кучайиши натижасида аланга тезлик билан янги ҳудудларга тарқалмоқда.
Ёнғин туфайли Ҳарманcик туманига қарашли Дутлужа, Илиcаксу, Чамоғлу va CHakmak қишлоқлари хавфсизлик нуқтаи назаридан бўшатилди.
Орҳанели-Ҳарманжик автомобиль йўли вақтинча транспорт ҳаракатига ёпилди. Фақат фавқулодда хизмат автомобиллари йўлдан фойдаланмоқда.
Орҳанели беледие (туман ҳокимлиги) раҳбари Али Осман Тайıр ижтимоий тармоқдаги чиқишида:
“Ёнғин назорат остига олинаётганди, лекин шамол уни яна кучайтирди. Танкерлари бор фуқароларни сув билан таъминотда ёрдамга чақираман”, — дейди.
Адлия вазири Йилмаз Тунч баёнотида, ёнғин юзасидан тергов ишлари бошланганини ва бир гумондорнинг ҳибсга олинганини маълум қилди.
Вазирга кўра, июнь ойидан буён мамлакат бўйлаб чиқаётган ўрмон ёнғинлари бўйича олиб борилаётган терговлар доирасида 21 киши қамоққа олинган.
Ёнғиннинг сабаби ҳали аниқланмаган, лекин одам қўли билан юзага келган бўлиши мумкинлигидан хавотирлар бор. Расмийлар вазиятни назоратга олишга ҳаракат қилмоқда.
