АҚШ ҳукумати USAID (Халқаро тараққиёт агентлиги) томонидан Жо Байден маъмурияти даврида харид қилинган 10 миллион долларга тенг аёллар контрацептивларини ёқиб юборишга қарор қилди. Бу ҳақда кеча, 28 июль куни AFP агентлиги хабар берди.
Гап ҳомиладорликнинг олдини олувчи воситалар — бачадон ички спираллари, имплантатлар ва дори таблеткалари ҳақида бормоқда. Ушбу воситалар дастлаб камбағал давлатларга ёрдам сифатида мўлжалланган эди, бироқ USAID дастурлари ёпилгач, контрацептивлар Белгияда омборларда қолиб кетди.
Эндиликда бу контрацептивлар Франциядаги чиқиндиларни ёқиш заводига юборилиши режалаштирилган. Уларни йўқ қилиш жараёни ўзига хос харажатларни ҳам талаб қилмоқда — фақатгина утилизация учун 167 минг доллар сарфланиши кўзда тутилган.
Сўнгги кунларда бир нечта халқаро ноҳукумат ташкилотлар АҚШ ҳукуматидан бу контрацептивларни қашшоқ мамлакатларга топширишни сўраган.
Бироқ Вашингтон бу таклифни рад этган. Белгиянинг Ташқи ишлар вазирлиги эса АҚШ элчихонаси билан музокаралар олиб бораётганини ва уларни фикридан қайтаришга уринишаётганини билдирди.