2022–2023 йилларда Арманистон Россия олтинининг Дубай, Гонконг ва Хитойга экспортидаги муҳим транзит нуқтага айланганди. Бу ҳолат мамлакат иқтисодиётида сунъий ўсишни таъминлади. Бироқ 2024 йилга келиб, бу оқим кескин қисқарди.
Натижада давлат бюджети 500 миллион доллар атрофида солиқ йўқотди. Молия вазири Ваге Ованесян буни 2023 йилдаги ноодатий кўрсаткичлар билан боғлади.
Экспорт билан шуғулланган компанияларга ҚҚС қайтарилгани эса бюджет даромадларини янада қисқартирди.
Экспертлар фикрича, бу даврда кирган маблағлар ишлаб чиқаришга эмас, кўпроқ пойтахтдаги қурилишларга йўналтирилган.
Бу эса ҳудудлар билан Ереван ўртасидаги иқтисодий тафовутни кучайтирган. Иқтисодчи Агаси Таваданнинг айтишича, Россия олтинининг реэкспорти Арманистон учун йўқотилган имконият бўлиб қолди.
