Самарқанд шаҳри ва Самарқанд туманидаги ҲЕТК инспекторлари 54 та бодикамера билан таъминланган. Бу орқали ходимларнинг истеъмолчилар билан мулоқоти, жойларда ўтказган ўрганиш ишлари ёзиб олинади.
Электр таъминоти корхонаси ва истеъмолчи ўртасидаги муносабатларда шаффофликни таъминлаш, коррупсион ҳолатларнинг олдини олиш мақсадида тизимни рақамлаштириш, замонавий технологиялардан фойдаланишга алоҳида эътибор қаратилмоқда.
Ҳозирда «Ҳудудий электр тармоқлари» акциядорлик жамияти «Энергосавдо» Самарқанд филиалида Э-далолатнома расмийлаштириш тизими йўлга қўйилган бўлиб, туман ва шаҳар электр таъминоти корхоналарига 158 дона планшет ажратилган.
Инспекторлар томонидан ҳар бир далолатнома ушбу планшетлар орқали тузилиб, тизимга киритилади. Қоғоз далолатномалардан фарқли равишда ҳар бир далолатноманинг ҳисоби юритилади ва ижроси таъминланади.
