Россия президенти администрацияси раҳбари ўринбосари Дмитрий Козак Украинадаги урушни тўхтатишни ва музокараларни бошлашни таклиф қилди. Бу ҳақда The New York Times хабар берди.
Билдирилишича, Козак президент Владимир Путинга жангларни тўхтатиш режасини тақдим этган. У Россияда ички ислоҳотлар ўтказишни, куч тузилмаларини ҳукумат назоратига ўтказишни ва мустақил суд тизимини яратишни таклиф қилган.
Козак узоқ йиллар муҳим давлат лойиҳаларини бошқарган бўлса-да, сўнгги пайтларда Кремль ичида таъсирини йўқотиб бормоқда. Унинг кўплаб ваколатлари Украинага нисбатан қатъий позицияни қўллаб-қувватлайдиган ва босиб олинган ҳудудларни бошқаришда фаол иштирок этаётган Сергей Кириенкога ўтган. Шунга қарамай, Козак Украинадаги урушга норасмий равишда қарши чиқиши билан танилган кам сонли юқори лавозимли амалдорлардан бири ҳисобланади.
Таъкидланишича, Козак Украинага кенг кўламли ҳужум олдидан Путинни қароридан қайтаришга уринган. У президентни ҳужум оқибатлари, Украина армияси ва жамиятининг қатъий қаршилиги ҳақида огоҳлантирган.
Уруш бошланганидан кейин эса у ўт очишни тўхтатиш бўйича келишув тузишга уринган, бироқ Путин бу таклифларни рад этган.
