Бирлашган Миллатлар Ташкилотининг Фаластин ҳудудларидаги Инсон ҳуқуқлари бўйича махсус вакили Франческа Албанезе ҲАМАС ҳаракати борасида жамоатчиликда шаклланган стереотипларга эътироз билдирди. Унинг айтишича, кўпчилик ҲАМАС нима экани ҳақида нотўғри тасаввурга эга.
“ҲАМАС — бу сиёсий куч. У 2005-йилги демократик сайловларда ғалаба қозонган ва шундан бери Ғазо секторида амалда ҳокимият тепасида. ҲАМАС кимларгадир ёқмаслиги мумкин, лекин у мактаблар, шифохоналар, ижтимоий инфратузилма қурди. Уларни фақат террорчилар сифатида кўрсатиш бир томонлама ёндашув”, — дейди Албанезе.
Унинг фикрича, ҲАМАС фақат қуролли ҳаракат эмас, балки Ғазо аҳолисининг бир қисмини ифодаловчи сиёсий куч бўлиб, уларнинг мавжудлигини инкор этиш халқ иродасини инкор этиш билан баробар.
Мазкур баёнот халқаро майдонда баҳсли қарши фикрларни келтириб чиқарди. Исроил ҳукумати ва унинг иттифоқчилари БМТ вакилининг бу сўзларини кескин танқид қилди. Аммо инсон ҳуқуқлари бўйича ҳимоячилар Фаластиндаги мураккаб сиёсий контекстда ҳар икки томоннинг позицияларини тушунишга чақирмоқда.
Эслатиб ўтамиз, ҲАМАС ҳаракати Ғазо секторини 2007 йилдан бери бошқариб келмоқда ва кўплаб давлатлар, жумладан АҚШ ва Европа Иттифоқи уни террорчи ташкилот деб ҳисоблайди. Шу билан бирга, у Фаластиндаги ижтимоий ҳаётда муҳим роль ўйнашда давом этмоқда.
